Туган якка кайтыр чак җитә

«Хөрмәтле Әнзирә Зиннәт кызы! Сезнең улыгыз Айдар Азат улы үз хәрби бурычын намус белән үти. Хәрби әзер­лек барышында ул югары күрсәткечләргә иреште. Без аның уңышлары белән горурланабыз һәм Ватанның ышанычлы сакчысын үстергәнегез, тәрбияләгәнегез өчен рәх­мә­тебезне белдерәбез. Сез улыгыз белән чын мәгънәсендә горурлана аласыз!» – дигән сүз­ләр язылган кадерлесе хез­мәт ит­кән часть командование­сен­нән кил­гән Рәхмәт хатында.
Айдар мәктәп елларыннан ук үзен тик уңай яктан күр­сә­тә: яхшы укый, спортны үз итә. Ижау дәүләт техник уни­вер­си­те­тының төзелеш факультетында белем ала. Аннары Казан төзелеш-архитектура университетының магистратурасына укырга кереп, аны тик «бишле» билгеләренә тәмамлый. Университетта укыганда да спортны ташламый: баскетбол белән шөгыльләнә, марафонда йөгерүләрдә катнаша. Дипом алу белән армия сафына юлланган егет Ульяновск шәһәрендә әзерлек үткәннән соң, Уссурийск шәһәренә элем­тә­челәр гаскәренә билгеләнә. Күрүебезчә, булдыклы якташыбыз анда да сынатмаган.
Айдарның әнисе һәм якыннары янына кайтырына аз гына вакыт калган. Озакламый ул туган йорты бусагасын атлап керер. Әлегә аны якын кеше­лә­ре­нең сәгатьләрне санап көт­кән көннәре. Без дә хәрби хез­мәт­тәге якташыбызга, исән йөреп, сау кайт, дигән теләктә калыйк.
Эльмира Гәрәйшина.