Сыгылса да сынмас...

Әйе, ул җырларга ярата, мин аны сәхнәдә дә күргәнем бар. «Горурланам синең белән, Башкортстан!» дигән конкурста чыгыш ясап, тамашачыны елатканы хәтеремдә. Ул анда вокал буенча беренче урынга чыкты.
Актив тормыш алып баручы бу егет – Илшат Гыйльмияров. Артавыл авылында яшәү­че Гөлсәрия һәм Тәлгать Гыйль­мия­ровларның икенче баласы. Кеч­кенәдән хезмәт сөеп, әти-әни­се­нә булышып үсә ул. Дару үләннәре җыя, мал-туар карарга ярата. Авылда һәм мәк­тәп­тә оештырылган мәдәни чараларны да алып бара, моңлы тавышы белән тамашачыны таң калдыра ул. Аксәет мәктәбендә 9нчы сыйныфны тәмамлагач, Чернушка шәһәрендә урнашкан һөнәрчелек училищесына юллана. Анда ул өч ел эретеп ябыштыручы һөнәрен үзләштерә.
Җәй­ге матур көннәрнең бер­сен­дә Илшат армиягә чакыру кәгазе ала. Әти-әнисе туганнары табын корып, дус-туганнар, авылдашлар аны озатырга җые­лырга тиеш була. Нәкъ шундый ис­тәлекле көн зур фаҗигагә әй­ләнә – иптәш егете белән алар юл һәлакәтенә очрый. Илшат­ның умыртка сөяге сына, нәти­җә­дә аяклары йөрми башлый. Гаи­лә­гә килгән бу сынауны туганнар бергә күтәрә. Илшатны чиратлап тәрбиялиләр. Аңа җиде тапкыр операция ясыйлар. Соңгы тапкыр Дүртөйле шәһәрендә җиде сәгатькә сузылган операциядә үзебез үлеп терелдек, ди әнисе. Бик күп реабилитация үтәргә туры килә егеткә. Илшатка ике ел туктамый массаж ясыйлар. Акрынлап алга китеш сизелә. Туганнары җыелып, аңа тренажер алып бирә. Үзе дә бервакытта да мин авыру, дип кул кушырып, төшенкелеккә бирелеп утырмый, төрле спорт һәм мәдәни чараларда катнаша. Коляскада булса да, сәламәт кешедән калышмый. Дуслары, туганнары белән аралашып, алдагы көнгә өмет белән карый. Илшатның әнисе гомер буе китапханәдә эшләде. Әтисе урманчы хезмәтендә иде, эшләрен кыскарткач, мал-туар карап яши. Тырыш, бердәм гаилә.
Аллаһ Тәгалә кешене төрлечә сыный – берәүгә югалту, берәүгә авыру бирә. Кемдер шушы сынауларга чыдамый югалып кала, ә Илшат кебек тырышлар ерып чыга. Әле үзенә автомобиль алып биргәннәр. Тормышта, җәмгыяттә тулы канлы тормыш алып бара ул. Быел Уфада мөмкинлекләре чикләнгәннәр арасында ГТО нормативларын тапшырып, атыш буенча икенче урынга чыккан. Күптән түгел Нефтекама инвалидлар оешмасы оештыруы буенча Мәскәү шәһәрендә сәяхәттә булып кайткан. Күп йөрегән кеше күп күрә. «Ул аннан канатланып, шундый дәрт белән кайтты», – ди якыннары. Тамчы тама-тама ташны тишә, диләр. Аллаһ боерса, Илшатның да тырышлыклары бушка кит­мәс.
Фәрзәнә ИСМӘГЫЙЛЕВА.