Бәхет ул үзең белән

Тәтешлелеләр аны уңышлы эшкуар буларак белә. Баксаң, ул искиткеч модельер да икән әле: үз фантазиясен кушып, бик матур киемнәр иҗат итә, аларны үз куллары белән тегә. Уфада үткән мода күрсәтү конкурсында да чыгыш ясап, югары бәя алган. Ә менә Алсуның җырчы булуын белми идем әле.

–Кечкенәдән җырларга яраттым. Киләчәктә үз концертымны әзерләү, анда үзебез теккән киемнәрне күрсәтү теләгем дә бар, тормышка гына ашырырга насыйп булсын, – ди ул.

Гаиләсе белән дә бик бәхетле эшкуар ханым. Тормыш иптәше Илшат Мәгафур улы белән курчактай өч кыз үстерә алар.

–Бәхет ул үзең белән. Гаиләңдә барсы да яхшы булып, саулык-сәламәтлек булганда, кешеләргә игелекле хезмәт күрсәтеп яшәгәндә генә үзеңне бәхетле итеп тоеп була. Мин башкаларга да һәр көннең мәгънәсен табып, якыннарына, тирә-яктагыларга тик шатлык өләшеп яшәүләрен теләр идем. Яңа еллар барыбызга да бары тик сөенечләр генә алып килсен! – ди ул. Амин, шулай була күрсен!

Фото: гаилә архивыннан.