Бала йөзле иргә кияүгә чыгарга теләүче юк икән

Кечкенә чагында урамда уйнаганда, яшьтәше Чжу башына таш белән суга. Малайның башы канамый, әмма туганнары сүзләре буенча, 3 көн дәвамында аның югары температурасы төшми, ул саташып ята. Борчылган ата-анасы Чжуны дәваханәгә алып бара, табиблар, аның баш миендә кан оешуын күреп, ашыгыч рәвештә операция ясаганнар.
Малай терелә, аның тормышы нормальләшә кебек. Барысы да кайчандыр алган җәрәхәтне оныта, ләкин Чжуга 9 яшь тулганда, әти-әниләре улларының яшьтәшләреннән шактый аерылуына игътибар итә. Ул 6 яшьлек чагыннан алып бер дә үзгәрми...
Шөбһәләнгән ата-ана янә малайны табибларга күрсәтә. Медиклар малайның баш миендәге үсеш гормонын бүлеп чыгаручы гипофизга зыян килүен ачыклаган. Шуның аркасында ул 6 яшьлек чагындагы кебе катып калган.
Ул хәлләрдән соң 28 ел үткән, ә Чжу һаман да 6 яшьлек малай кебек. Аның сакал-мыегы да үсми, тавышы да балаларча нечкә. 34 яшьлек ир көн саен төрле кешеләргә үзенең бала-чага түгел икәнен исбатларга мәҗбүр. Әмма яшь ир өчен иң куркынычы болар түгел әле. Кызганычка каршы, үсеше тукталгач, ул җенси яклап та җитлегеп бетмәгән.
- Миңа 34 яшь булса да, тәнемнең функцияләре кечкенә баланыкы кебек. Шуңа да мин өйләнә дә алмыйм, - дип сөйли ул.
Табиблар бу очракта көчсез булуларын белдерә. Ә Чжу бик кайгырмаска тырыша.
- Минем дусларым кайчандыр картаеп, битләрен җыерчыклар басачак. Ә мин шушы самими йөзем белән һәрчак яшь булып калачакмын, - ди ул.