Алар иңендә яшь буын язмышы

Әбҗәлил районында туып-үскән Химмәт Әхтәмов, хәрби кеше буларак, кайда җибәрсәләр, шунда хезмәт итә. Башкортстанның күп кенә районнарында эшләгәннән соң, гаиләсе белән Югары Тәтешлегә килеп төпләнә алар. Сибай шәһәрендә дөньяга килгән кызлары Альбинага ул чакта нибары биш яшь була. Ул Югары Тәтешлегә килгәнен дә, балалар бакчасында тәрбияләнгәнен дә, 2нче мәктәп ишекләрен ачып кергәнен дә яхшы хәтерли. Өч бала анасы Венера Фатыйх кызы 2нче мәктәптә башлангыч сыйныфлар укытучысы булып эшли. Альбинаның абыйсы һәм сеңелесе дә әти-әни йөзенә кызыллык китерми, тырышып укыйлар, район тормышында актив катнашалар.

Мәктәп еллары үзенең истәлекле, мавыктыргыч чаралары белән тиз үтеп китә. Тормыш иптәше Фәрхәт Әүхәдиев белән бер сыйныфта белем ала Альбина. «Шундый тәртипле, кечкенәдән тыныч, акыллы, тырыш булды», – ди ул аның турында. Өлгергәнлек аттестаты алгач, Альбина, әнисе һөнәрен сайлап, Бөре педагогия институтын тәмамлый, ә Фәрхәт исә Башкорт аграр университетында табиб-ветеринар һөнәрен үзләштерә. Бер-берсе белән балачактан дуслашып йөргән Альбина белән Фәрхәт 1998 елда чәчләрен чәчкә бәйли. Гаилә учагына нур өстәп, кызлары Әлфия һәм уллары Азамат дөньяга килә. Әти-әниләрен шатландырып, алар да мәктәптә бик яхшы укып, мәдәни спорт чараларында катнашып үсәләр.

Мәгариф бүлеге алдында башкорт теле буенча кадрлар мәсьәләсе килеп тугач, чиста башкортча сөйләшкән Альбина Химмәт кызын сайлап, укырга җибәрәләр. Шулай итеп, ул Уфада икенче югары белем туп­лый һәм менә инде Югары Тәтешле 1нче мәктәбендә 30 елга якын хезмәт сала. Укучылар белән башкорт милли биюләр төркеме оештыра, фольклор төркем белән эшли. Башкорт теле укытучысы буларак, халык йолаларын тергезү, халык авыз иҗатын өйрәнү, яшь буында туган телгә сөю һәм илсөярлек тойгылары тәрбияләү эше алып бара ул. Заң башка, заман башка, дигәндәй, башкорт телендә КВН уеннары барлыкка килү белән Альбина Химмәт кызы да, ике уйлап тормый, команда җыя. «КВН – ул үз телеңне кадерләргә, фикер алышуга юнәлтелгән мавыктыргыч бер чара. Укучылар үз эченә йомылмасын, аралашсын, белмәгәннәрен өйрәнсен, иҗатка омтылсыннар, әхлаклы яшәү кануннарын үз итсен дип тырыша ул. Укучыларга мондый шөгыль бик ошый. Үткән елда Башкорт ачык КВН лигасында катнашып, 3нче урынга лаек булды алар.

«Мәктәп тормышы шундый күпкырлы һәм мавыктыргыч, анда көн үткәне сизелми дә кала. Махсус хәрби операция башлангач, «Үзебезнекеләрне ташламыйбыз» патриотик акциясенә кушылып, балалар белән яугирләргә хат язабыз, хәлдән килгәнчә ярдәм итәргә тырышабыз. Җәйләрен бакча үстерергә, кышларын гаилә белән чаңгыда йөрергә яратабыз. Хәзер күбрәге оныгыбыз белән вакыт үткәрергә омтылабыз. Дәү әни, дәү әти булырга насыйп булды. Фәрхәтнең дә эше җаваплы. Ул район ветеринария станциясендә табиб булып эшли. Тормыш дулкынында йөзеп, балаларның үсеп канат ныгытканын да сизми калганбыз. Әлфиябез минем һөнәрне үз итеп, укытучы булды. Киявебез Виталий белән үз ояларын кордылар. Кияү бабай туфрагыннан ярала, ди халык. Ул да Фәрхәт кебек эшкә уңган, тырыш кеше. Ә Азамат улыбыз кечкенәдән спорт­ны үз итте. Дәү әти кебек хәрби булам, дип хыялланды. Ул бүген Воронеж хәрби академиясенең 4нче курсында белем ала. Елына бер-ике тапкыр гына кайтып әйләнә. Хәрбиләрнең тормышы шундый. Шулай да әтисе белән мәчеткә барырга, дога кылырга вакыт таба. Ә тормыш иптәшем күптән инде дингә бирелгән кеше, биш вакыт намазын калдырмый», – ди Альбина Химмәт кызы. Үзендә дә мөселман хатын-кызларына хас тыйнаклык, әдәплелек, кешеләрне яратуы күзгә бәрелеп тора. Тормышны сөеп, һөнәренә бирелеп хезмәт салган тынгысыз укытучының эшен район мәгариф бүлеге, РБ Мәгариф министрлыгы Почет грамоталары бизи. Иң мөһиме: ул укучыларының яраткан укытучысы, хезмәттәшләре арасында абруй казанган белгеч.

Тормыш иптәше Фәрхәт быел җәй үзе теләп махсус хәрби операциягә юлланды. «Ватан алдындагы бурычым – илне саклау, балаларыбыз тыныч йокласын, укысын, лаек­лы кешеләр булсыннар», – ди ул. Старшина Фәрхәт Гандәлиф улы Луганск Республикасында алгы сызыкта укчы булып хезмәт итә. Декабрь аенда кыска вакытлы ялга кайтты. Яңа ел алдыннан озак еллар ветеринария хезмәтендә көч салганы өчен Фәрхәт Әүхәдиевны БРның ветеринария буенча дәүләт комитеты «Хезмәтләре өчен» медале белән бүләкләде. Аркасына юл букчасын асып, якыннары белән саубуллашып, тагын яуга китте ул.

Бер карасаң, бик матур, тыныч тормышта яшибез. Ә бер карасаң, дөньяны фетнә бас­кан. Үзебезгә турыдан-туры кагылгач кына аңлыйсың андый хәлләрне. Сугышлар бетсен, дигән уйлар белән ятабыз,  исән-саулармы икән, дигән уй белән торабыз. Халыкка, хакимият башлыгына рәхмәт, яугирләргә һәрвакыт ярдәм кулы сузалар. Күпме гуманитар ярдәм китә, барсы да җиңү өчен. Туган җиребезне афәттән саклау өчен көрәшә бит алар. Ә туган йортта Альбина ханым кебек сабыр холыклы, ачык йөзле, якыннарына күңел җылысы өләшерлек тормыш иптәшләре, дәү әтиләренең көчле кулларында тибрәләчәк сабыйлары – оныклары, балалары көтә. Әйе, ил-көннәребез тыныч булсын, эшләребез гөрләп барсын. Туган туфрагыбызны дошман таптамасын өчен кулына корал алган якташларыбыз исән-сау гына булсыннар. Ходай Тәгалә кодрәтеннән ташламасын!