Самавыр җыры ынмасын сыйлы табыныбызда.

Яңа ел бәйрәме көннәре район халкына бай һәм якты чаралар программасы тәкъдим итте. Яңа ел чыршысын ачу тантанасыннан башланган бәйрәмнәр, балалар һәм өлкәннәрне, мөмкинлекләре чикләнгәннәрне, әтиләре махсус хәрби операциядә булган балаларны котлау белән бергә спорт уеннары, төрле кызыклы очрашулар, теләкләр чыршысы, кичәләр белән дәвам итте.

Ун көнлек бәйрәм чаралары районның төп мәйданында «Самавыр бәйрәме» белән тәмамланды. Шунда ук гаилә спорт уеннары, христиан динлеләрнең Раштуаны бәйрәм итүе бергә үрелеп, барысын да шатлыклы минутларга күмде. Мәдәният хезмәткәрләре, китапханәчеләр, авыл Советы биләмәләре әзерләгән бу тамаша, катнашучыларның үзләре теккән костюмнары, атрибутлары белән баетылып, халыкны үзенә җәлеп итеп торды.

Бәйрәм түренә бик күп гаилә серләрен саклаган, тормыш вакыйгаларына шаһит булган самавырлар кунаклаган. Иң кечкенә сувенир самавырдан алып, 2, 3, 4, 5, 8 литрлылары. Республика бәйрәмнәрендә булып кайткан иң дәү һәм борынгы самавыр ялгызнаратлылар өстәлен бизәде. Самавырлар формалары, төсләре буенча да аерылып, тамашачыда кызыксыну арттырды. Өстәлләр мәтрүшкәле чәй, башкорт балы һәм милли ризыклардан сыгылып торды. Салкын һавада өшегәннәр эссе самавыр чәе эчеп, бәлеш-тәбикмәкләрдән авыз итте. Акбулатлылар һәм ялгызнаратлылар кунакларны  яңа пешкән тәбикмәкләр белән сыйлады.

Бу бәйрәмгә бөтен биләмәләр дә җитди караган. Самавыр янында махсус операциядә катнашучы яугирләребезнең фотосурәтләре урын алган, татулыкка, бердәмлеккә өндәү плакатлары эленгән. Шулай булмый ни, без бит шул самавыр чәйләре эчеп үскән буын. Аның эчләрендә түгәрәк йомырка пешергән чаклар онытыламы соң?!

Тарихи язмаларда Русиядә беренче самавырлар 1778 елда Тула шәһәрендә чыккан дип фаразлана. Өч йөз ел тарихы булган самавырның бүген дә өстәл уртасында булып, кунаклар җыюы үзе зур бәхет. Яңа ел көннәрендә «Самавыр бәйрәме» үткәрү матур традициягә әйләнеп баруы да куанычлы. Мондый чаралар тарихыбызны күзалларга ярдәм итә, халыкны берләштерә, яшь буында ата-бабаларыбыз тормышы белән кызыксыну уята.

Бер үк вакытта мәйданда мавыктыргыч гаилә спорт ярышлары да узды. Анда авыл Советларыннан унбер спорт сөюче гаилә көч сынашты. Ярышлар бер сулышта узды һәм һәр яңа конкурс көчле алкышларга күмелде. Гаиләләрнең актив катнашуы бу вакыйганы онытылмаслык итте! Шулай ук балалар иҗат үзәге хезмәткәрләре мастер-класслар оештырды.

Бәйрәмдә рухани Александр халыкны Раштуа бәйрәме белән котлады. «Нинди генә дин әһеле булмасын, безнең бердәм һәм бергә булуыбыз кирәк. Яңа ел йортларыгызга тынычлык һәм бәхет, шатлык һәм җылылык алып килсен!» – диде ул. Гаилә спорт уеннары һәм район мәдәният сарае артистлары чыгышы белән үрелеп, мәйдан уен-көлке җыр-биюдән тынып тормады.

Мәдәният хезмәткәрләренең Яңа елга әзерлекләренә  йомгак ясалды. Җиңүчеләр Почет грамоталары һәм сертификатлар белән бүләкләнде. Яңа 2025 ел яңа мөмкинлекләр һәм казанышлар алып килсен!