+1 °С
Кар
Барлык яңалыклар
Иҗат
2 август 2019, 18:11
райондашлар иҗаты
Сәвәләй егете Феликс Галишановның Синең белән кавышырга иде, Шатланам, Шагыйрьләр хыялыйлар һ.б шигырьләрен яратып укыйбыз.
Синең белән кавышырга иде,
Алдан әзерләнгән келәттә.
Өзелепләр калган бер җыр сыман,
Зур үкенеч йөри йөрәктә.
Синең белән кавышырга иде
Бикләнергә иде бер төнгә.
Башка берәү белән бикләде шул
Язмыш дигән усал бер җиңгә.
Синең белән кавышырга иде
Акланмады минем ак теләк.
Безнең кайнар сулышларны көтеп,
Карайгандыр инде ак келәт.
Синең белән кавышырга иде.
Һич тормышка ашмый шул теләк.
Җиңгә бикләп куйган ак келәттәй
Ачылмас ла инде бу йөрәк.
Балдагыңны зинһар күрсәтмә.
Кургаш сыман ята йөрәккә.
Умырыплар тешләп алыр идем,
Буем гына җитми терсәккә.
Әллә богау синең балдагың?
Сыгыла бит бугаз-тамагым.
Син үзеңне үзең алдасаң да
Мин үземне килми алдасым.
Сагышымны вакыт таратмый,
Беркемне дә йөрәк яратмый.
Бер кысармын, бер кочармын сине,
Бармагыңны кыскан балдактай.
***
Шагыйрьләр–хыялыйлар диләр,
Әйтсеннәр лә, шуннан ни-нәрсә?
Киңәйтәләр түгелме соң алар,
Күңел офыгыгыз тарайса.
Кабызалар өмет хыялыйлар,
Күңелегездә илһам уятып
Йолдызларга китсә алар алып,
Торырсыз сез карап-шаккатып.
Хыялыйлар аркасында, бәлки.
Йолдыз парыгызны күрерсез.
Йөрәкләрдән йөрәкләргә сөю
Ай нурында төнлә үрерсез.
Шагыйрьләр–хыялыйлар диеп.
Атынамын хыял–таганда.
Тәкъдиремә әйтәм рәхмәтемне,
Каурый каләм биргән туганда.
Читайте нас:
© 2025 Общественно-политическая газета. Учредитель: Агентство по печати и средствам массовой информации Республики Башкортостан и ГУП РБ Издательский дом "Республика Башкортостан"
Регистрационный номер: Свидетельство ПИ № ТУ02-01434 от 1 сентября 2015 года
Главный редактор: Файзрахманов Рафит Хайварович
Телефон
8(34778) 2-13-98
Электрон почта
Адресы
452830, Республика Башкортостан, Татышлинский район, с. Верхние Татышлы, ул. Ленина, д. 91
Реклама хезмәте
8(34778) 2-10-14
Редакция
8(34778) 2-15-70
Кадрлар бүлеге
8(34778) 2-11-82