ГТО үсеше өчен матди ярдәм

Республикада ГТО нормативларын тапшыру өчен, бүгенгесе көндә 69 үзәк эшләп килә. Хәзерге вакытта республиканың 405 меңнән артык кешесе «Хезмәткә һәм оборонага әзер» автоматлаштырылган системасында теркәлгән. Хөкүмәт утырышында комплекс үсешенә шәһәр һәм районнарга бюджеттан акча бүлеп бирү тәртибе каралды.

Күрсәткечләрне яхшырту һәм ГТО тапшыруның абруен күтәрү өчен, Республика казнасыннан 21 млн 741 мең сум акча бүленәчәк. Бүлеп исәпләгәндә, муниципалитетлар 315 мең сум акча алачак. Шул рәвешле, Хөкүмәт ГТО тапшыруга республикада яшәүчеләрне күбрәк җәлеп итәргә һәм илнең иң яхшы ун төбәгенә керүне максат итеп куя.