Стәрлетамак госпитале төзелешендә эш кайный!

Эшләр тәүлек әйләнәсенә башкарыла. Бүген төнлә генә 106 эшче һәм 14 техника берәмлеге эшләгән. Директорның төзелеш буенча урынбасары Олег Бабенков әйтүенчә, бетон эшләре 100 процентка тәмамланган, агач утырту һәм территорияне төзекләндерү эшләре тәмамланып килә.

Төзелеш бер минутка да тукталып тормый, объект 1 декабрьдә тапшырылырга тиеш. Уфа районындагы госпиталь белән чагыштырганда, бу проект технологик яктан күбрәк җиһазландырылган, биредә балалар, бала тудыру һәм хирургия бүлекләре булачак.

Яңа корпусның гомум койка куәте – тәүлек әйләнәсендәге 60 бокс һәм 14 реанимацион бокс (аларның өчесе балаларныкы, тугызы өлкәннәр өчен, бер бокс операциядән соң тәгаенләнгән).

Йогышлы авырулар бүлеге урамга чыгучы ике шлюзлы, санитар бүлмәләре булган, кислород тоташтырылган бокслар белән җиһазландырыла.

Стәрлетамак йогышлы авырулар үзәгендә хирургия бүлеге эшләячәк, анда табиблар ковидлы һәм башка инфекцияле пациентларга операцияләр ясый алачак.

Үзәк составына акушер-гинекология блогы, кабул-итү диагностика бүлеге, бактериологик лаборатория, даруханә керәчәк. Табиблар 40 урынлык уңайлы тулай торакта яши алачак.

Дәваханәнең медицина газлары һәм кислород әзерли торган үз станциясе, чистарту корылмалары һәм дизель электростанциясе, автотранспортны дезинфекцияләү станциясе булачак.

Төзелешне карарга килгән чагында Башкортстан Башлыгы Радий Хәбиров Стәрлетамакның югары сыйфатлы, заманча күппрофильле, иң заманча җиһазлар белән тәэмин ителгән дәваханәсе булачагын әйткән иде.

Төзүчеләр ышандыруынча, биналар илле елдан артык хезмәт итәргә тиеш.

Госпитальне төзүгә Башкортстан бюджетыннан 2,195 миллиард сум бүленгән, аларның 1,4 миллиарды – төзелеш-монтаж эшләренә, 795,6 миллионы медицина һәм башка җиһазлар, мебель, хуҗалык инвентарена, автотранспорт алуга юнәлтелә.

Чыганак https://kiziltan.rbsmi.ru/articles/budni/St-rletamak-gospitale-t-zeleshend-esh-kayniy-538544/