Максат бер – туган телне саклау

Корылтай эшендә тарих фән­нәре кандидаты, журналист, продюсер, телепроектлар авторы һәм алып баручысы Салават Хәмидуллин, тел, мәдәният, һәм табын башкортлары йолаларын саклау буенча «Табын ырулары берләшмәсе» төбәк җәмәгать оешмалары башкарма комитеты әгъзалары Ниязбай Сәлимов, Фәнил Кудакаев, Гарифулла Япаров, Әлфия Гыймадиева, Бөтендөнья башкортлары корылтае башкарма комитеты әгъзасы Марат Гыйльманов, район хакимияте башлыгының социаль мәсьә­ләләр һәм кадрлар буенча

урынбасары Рәлиф Рәхимов катнашты.

Район башкортлары ко­рыл­таеның башкарма комитеты рәи­се Әдһәм Фәрвәзетдинов район башкортлары корылтае ко­митетының узган елдагы эш­чән­легенә күзәтү ясады.

– Бүген районның 14 мәк­тә­бендә биш туган тел укытыла. Аларны 2 278 бала өйрәнә, бу барлык укучыларның 81,4 проценты. Башкорт телен өй­рә­нү­челәр саны – 1 414, ягъни 88 процент. Мәктәпләрдә һәм балалар бакчаларында халык йолаларын, традицияләрен өйрәнүгә зур игътибар бирелә. Туган телне укыту заманча технологияләр белән җиһазландырылган кабинетларда алып барыла. Әд­һәм Мәгъдән улы балаларны олимпиадаларга, конкурсларга җә­леп итүгә, аларда ире­шел­гән уңышларга тукталды, би­ләмәара мәдәни ял үзәге, китапханәләр, музейлар тарафыннан алып барылган конкрет эшләр турында сөйләде.

Табын ыруы район идарәсе җитәкчесе буларак, ике ел эчендә башкарылган эшләр турында Насыйбулла Хөснуллин бәян итте. Ул ыруларны өйрәнү, шәҗәрәләр төзү, аны зурлап үткәрү һәм башка чараларны оештыруда ярдәм күрсәткән һәркемгә рәхмәтен белдерде. Бәдрәш мәктәбенең башкорт теле һәм әдәбияты укытучысы Римма Бүләкова тел укытуны заман югарылыгына күтәрү, яңа технологияләрне кулланып укыту турында чыгыш ясады. «Туган телләрне укытуны сак­лап калу – алда торган мөһим мәсьәләребезнең берсе», – диде ул.

Артабан сүз мәртәбәле кунакларга бирелде. Чыгыш ясаучылар Салават Хә­ми­дул­лин, Фәнил Кудакаев, Марат Гыйльманов телебезне, шә­җә­рә­без­не ныклап өйрәнү, тер­ге­зү юнәлешенә активрак булырга чакрыды, агымдагы елда «Табынфест» республика фо­ру­мының безнең районда үтә­чәген билгеләп, аның әһә­мия­тен ассызыклады.

Район башкортлары корыл­тае­ның башкарма комитеты әгъзалары карары белән аның яңа рәисе итеп район мәдәният идарәсе начальнигы Әлфия Шәйнурова, район яшьләр корылтае рәисе итеп балалар сәнгать мәктәбе директоры Айнур Кыямов билгеләнде. Шулай ук V Бөтендөнья башкортлары корылтаена делегатлар сайланды.

Чара ахырында иҗат коллективлары тарафыннан әзер­лән­гән концерт номерлары күр­сә­тел­де, башкортлар корылтае башкарма комитетының бер төр­кем иң актив әгъзалары Рәх­мәт хатлары белән бү­ләк­ләнде. Җыйналучылар игътибарына фойеда халык эш­лән­мә­лә­рен­нән торган бай күргәзмә, күренекле якташлар турында бәян итүче стенд тәкъдим ителде.

Эльмира Гәрәйшина.