Яңа ел кичендә телевизордан нәрсә карарбыз?

Русиянең атказанган артисты Валерий Меладзе эстрада башкаручыларын Яңа ел телепрограммаларында төшмәскә чакыра. Үзенең мөрәҗәгатен ул Instagram да бастырган.

Меладзе пандемия аркасында хакимият тарафыннан кертелгән театрлар һәм музыкаль мәйданчыклар белән бәйле чикләүләргә зарлана.

“Спектакльләр, концертлар һәм башка киңкүләм чаралар 15 гыйнварга кадәр гамәлдән чыгарылган. Барлык артистлар, музыкантлар, техника, промоутерлар һ.б. алга таба да эшсез утырачак, инде 8 ай алар акчасыз утыра. Һәм бу беркемне дә борчымый", — дип яза ул.

Меладзе артистларны Яңа ел төнендә кешеләр телевидениедә бер генә артистны да күрмәсен өчен тапшыруларда катнашудан баш тартырга чакыра. Җырчы фикеренчә, шулай гына күңел ачу индустриясеннән дистәләгән мең кешенең эштән мәхрүм ителүенә игътибарны җәлеп итәргә мөмкин.