Фронтовик улы

Бу язмам II-Җиремҗибашта гомер иткән биш бала атасы, ун оныкның дәү әтисе Рәдим Гыймалетдинов турында.

Ир-егетнең асылы илдә танылыр, диләр. Әтиләре Фәтхи Гыймалетдин улы Бөек Ватан сугышында һәлак була. Фронтовик балалары ятимлек, ачлык-ялангачлык белән кө­рәшеп үсеп, илебезгә намуслы хез­мәт иттеләр. Сәетҗан Свердловскийда төзелештә эшләсә, Рәдим әтисе нигезен, аның эзе калган иген кырларын, басу-урманнарын ташламады. Күр­дем мәк­тә­бен­дә сигезенчене тә­мамлагач, Бәдрәш һөнәрчелек училищесында киң профильле механизатор һөнәрен үз­ләш­терде. Әнисе Хәдичә апа аңа ир-егетнең бәхете илендә, халкы белән җи­рендә икәнлеген кечкенәдән төшендерде. Аның изге киңәше зур тәрбия чарасы булганлыгын еллар үткәч аңлады егет.

Рәдим Бүәдебашта яшәгән Сә­лимә һәм Сабирҗан Фаз­лы­ев­ларның кызы Санияне тормыш юлдашы итеп сайлап ялгышмады. Бу 1966 елның марты иде. Яшьләр Карман ГРЭСына эшкә китте. Туган туфрак тартуы белән бер елдан кире авылга кайттылар. Рәдим колхозда «Беларус» тракторында эшли башлады. Аның 34 ел гомере К. Маркс исемендәге ху­җалыкта тракторчы буларак үтте. Рәдим Фә­тхи улының хезмәте югары бәя­ләнде – Социалистик ярыш алдынгысы билгесе, Коммунистик хезмәт ударнигы исеме, күпсанлы Мактау грамоталары шушы турыда сөйли.

Сания Рәдимгә ныклы терәк, тугры, акыллы хатын булды. Биш баланың яраткан әнисе, бәйләм, аш-су остасы гаилә бәхете өчен янып яшәде. Оста бакчачы, уң­ган терлекче дә булды. Күпләп мал карадылар, артканын сатып, акча эшләделәр. Сания озак еллар мәктәптә җыештыручы булып эшләде.

Мин Күрдемгә килен булып төшкәч, Рәдим абый бер чиләк алма күтәреп килеп керде. «Килен күрергә килдем әле, бәхетле гомер кичерегез, сәламәтлек телим үзегезгә», – дигән сүзләре һич онытылмый.

Ул хатынының кар­дәш-ту­ган­на­рын гомергә ихтирам итеп яшә­де. Йөрәгендә шәфкать хисе булган яхшы зат, балта остасы да ул якын кешебез. Без яңа йортның ишеген ачып кергәч, матурлап, сырлап тәрәзә шаллары ясап бирде. Үзенең йорт ихатасы да авылда үрнәкле. Өй алдында балалар уйнар өчен мәйданчык та эшләп куйды ул. Балаларына да югары белем алырга булышты, улларына өй салып чыгуда зур ярдәм күр­сәт­те. Кызлары Рида Нефтекамада 13 ел укытучы булып эшләде, хә­зер сәүдә өлкәсендә хезмәт итә. Рамиле себердә нефтьче, Радигы хуҗалыкта тракторчы, Айдар нефтьче-электрик, Алмаз Неф­текамада полиция хез­мәт­кә­ре, майор. Балалары аларның горурлыгы. Һәрвакыт әти-әни­лә­ренә ярдәмләшеп яшиләр.

Күптән түгел Рәдим Фәтхи улына 80 яшь тулды. Хезмәт ке­ше­сенә хөрмәт зур без­дә. Күр­дем авыл Советы би­лә­мәсе, К. Маркс исемендәге АПК идарәсе аны юбилее белән тәб­рик­ләде. Ветеран улының тормыш юлы матауга лаек. Ул иле, гаиләсе, балалары, туганнары өчен янып яши, авылдашларын хөрмәтли. Гомере буе ке­ше­ләргә яр­дәм­ләшеп яшәде, шуңа олылыйбыз аны.

Ятимлектә үткән балачагын искә алып, тор­мыш­ның, хез­мәт­нең, җир-су­лар­ның, ипи­кәй­нең кадерен белеп яшәргә өн­дәде, дөнья­лар­ның имин булуын те­ләп, ка­дер­ле­лә­ренә рәх­мәт белдерде Рәдим Фәтхи улы.

Фидәлия Мостафина.

Фото гаилә архивыннан.