Барлык яңалыклар
Яшәеш
21 март 2019, 13:21

Дефицит йөзләр

Макулатура җыябыз. Кочак-кочак кәгазьләр янында совет чорында басылган журналлар да килеп чыкты. Алар арасында «Крестьянка», «Работница», «Кос­тер», «Огонек», «Женский журнал» бар иде. Аларны шунда ук капчыкка тыгарга кулым бармады. Чираттагы кичем безнең әти-әниләр, зүрнәй-зүр­әтәй­ләр яратып укыган журналларны актарып, укып, ул чор сулышын күз алдымнан үткәреп узды.

Алар, билгеле, кәгазьнең сыйфаты буенча хәзерге ялтыравыклы журналлардан күпкә кайтыш. Тик совет чоры журналларында ярым шәрә җырчылар да, де­пу­татларның дәүләткә бер тиен файда күр­сәт­мә­гән, иллә мәгәр акчага коенган сөяркәләре дә юк. Аларның һәр санында завод-фабрика эшчеләре, производство алдынгылары данланган, икмәк-сөт җитештерүчеләр макталган. Әнә, бер «Крестьянка»да станок артында елмаеп, ипле генә киенгән хатын-кызлар тора һәм алар­­ның хезмәт күрсәткечләре язылган. Икенче би­тен­дә тулышкан башаклары белән бодай басуы җәй­рәп ята. Комбайн каршына утырып, механизаторлар тамак ялгый. Владимир өлкәсенең «Большевик» колхозы уң­ган­нары икән бу. Журналларның исеме үк хез­мәт­кә, тәр­тип­кә өнди: «Работница», «Крестьянка», «Пионер»... Ә, бе­ләсезме, миңа аеруча нәрсә ошады? Йөз­ләр. Гади эшче халыкның канәгать йөзләре. Уйлап-уйлап тордым да, мин күптәннән мондый йөзләр күр­мә­гән­мен икән: урамда да, хәзерге журналларда да, телевидениедә дә.
Игътибар итсәгез, хәзерге телевидение, журналлар «геройлары», алдан әйтеп китүемчә, тәртип ягы чамалы булган җырчылар, шундый ук бизнесменнар, сәясмәннәр. Гади халык йөзе дефицит һәм ул бүгенге көндә кемгә кирәк тә?
Әлфия СӘЛИМГӘРӘЕВА.
Читайте нас в