Ислам тәмәке тартуны тыя

– Фәнис хәзрәт, күпләрне борчыган сорау: мөселман кешегә тәмәке тарту хәраммы?

– Сер түгел, дин әһелләренең бу турыда фикерләре төрле. Коръәндә бу сорауга төгәл генә җавап юк. Галимнәрнең күбесе исә «хәрам» дигән фикердә. Ни өчен? Чөнки Аллаһы Тәгалә Коръәндә: «Яхшы, файдалы әйберләрне сезгә хәләл кылдык, зыянлы әйберләрне хәрам кылдык», – дип әйтә. Тәмәкенең, нинди генә яктан карасак та, файдасы юк, кешегә ул бары зыян гына китерә.

– Тәмәке тартучы ураза тота аламы?

– Тәмәкесен тартса, әлбәттә, юк. Ураза тотасы килсә, ташлый инде. Ихтыяр көче дигән нәрсә бар бит.

– Тәмәке тарткан кайбер кешеләр мәчеткә барырга читенсенә...

– Һәм дөрес эшлиләр. Тәмәке тартучы үзеннән килгән начар ис белән мөселманнарны, фәрештәләрне тынычсызлый, зыян сала. Пәй­гамбәребез әмер бирде: «Суган, сарымсак ашаган хәлегездә мә­чет­кә кермәгез!» Үзегез фикер йөртеп карагыз инде, пәйгамбәребез хәләл булган нәрсәне ашаган хәлдә мәчеткә керүне тыйгач, авызыннан тәмәке исе килгән кеше хакында нәрсә әйтергә кала?

– Тәмәке тартучы дин әһеле була аламы?

– Дин әһеле һәркемгә үрнәк күрсәтергә, яхшылыкка өндәргә тиеш. Әгәр дә андый кеше халык арасында тәмәке тартып йөри икән, аңа хөрмәт бетәчәк. Дин кешесенең сүзе белән эш-гамәле бер-берсенә туры килергә тиеш.

– Соңгы елларда кальян белән мавыгалар. Ул рөхсәт ителәме?

– Кальян да ярамый. Табиблар хәтта, кальян тәмәкедән дә зыянлырак, дигән фикердә.

– Тәмәке тарту – үзеңне акрынлап үтерү.

– Бик дөрес. Тәмәке – ул агу, ул кешенең организмын агулый һәм үлемгә илтә. Моңа Раббыбызның аяте дә дәлил булып тора: «Үзе­гез­не үзегез һәлакәткә ташламагыз, чынлыкта Аллаһ сезгә рәхим­ле!» Пәйгамбәребез исә сәламәтлекне саклау хакында берничә хә­дис­тә әйткән.«Дүрт нәрсә хакында җавап бирмичә, кеше беркая да китми. Беренчедән, гомереңне ничек үткәрдең? Икенчедән, гыйлемең­не ничек кулландың? Өченчедән, малыңны кая кулландың? Дүртен­че­дән, сәламәтлегеңне ничек кулландың?»

Раббыбыз Аллаһ халкыбызга аракы-сыра эчүдән, тәмәке суырудан, наркотикларны кулланып яшәүдән туктарга насыйп итсә иде. Хәләл гамәлләр генә кылып, хәләл ризыклар ашап-эчеп кенә яшәргә язсын. Амин!

Әлфия СӘЛИМГӘРӘЕВА әңгәмәләште.