Барлык яңалыклар
Мәгариф
12 март , 14:36

Күрдем мәктәбе яңара

Башкортстанда мәгариф системасы соңгы елларда сизелерлек үзгәрешләр кичерә. Моңа ачык мисал булып мәгариф инфраструктурасын яңарту, заманча технологияләр кертү һәм укучыларның да, педагогларның да индивидуаль ихтыяҗларына игътибар итү тора.

Күрдем мәктәбе яңара
Күрдем мәктәбе яңара

«Мәгариф» федераль программасы гамәлгә ашырылган чорда 146 мәктәп бинасы ремонтланды, 1,5 мең урынлык дүрт мәктәп файдалануга тапшырылды, быел тагын 10 мең урынлык тугыз мәктәп төзелешен тәмамларга кирәк булачак, – дип билгеләп үтте Башкортстан Республикасы Хөкүмәте Премьер-министры Андрей Назаров.

Соңгы елларда районыбызның мәгариф учреждениеләрендә дә зур үзгәрешләр күзәтелә. 2023 елда район үзәгенең 1нче һәм 2нче, Түбән Балтач мәктәпләрендә капиталь ремонт үтте. 2024 елның азагында Күрдем мәктәбендә дә шундый ремонт эшләре башланды. Проектның хакы 86496,970 мең сум. «АНК Башнефть» җәмгыятенең хәйрия фонды аша бүленгән бу сумма белем учагын ремонтлау, җиһазлар сатып алу һәм аның тирә-ягын төзекләндерүгә юнәлдереләчәк.

Мәктәпнең икенче катында кабинетларны буяу төгәлләнгән, түшәмнәр монтажланган, тәрәзә яңакларына сэндвич-панельләр куела, идәннәргә линолеум җәелә, металл ишекләр урнаштырылган. Беренче катта подрядчылар бүлмәләр бүлү эшләрен төгәлләгән, стеналарны тигезләү эшләре бара, ашханә һәм мәктәп фойесының идәннәрен бетонлаштыру башланган.

– Мәктәпкә күп еллар буена капиталь ремонт үткәрелмәгән. Ниһаять, укучылар заманча шартларда белем алачак. Барлык эшләр дә планга ярашлы бара. Киләсе уку елын яңартылган белем учагында каршыларбыз дип ышанабыз, – ди Күрдем мәктәбе директоры Ләйсәнә Гатауллина.

Районның яңартылган белем учаклары мисалында дәүләт программасы нәтиҗәсендә балаларны укырга, иҗат итәргә һәм сәләтләрен үстерергә дәртләндерүче уңайлы, имин һәм заманча белем бирү мохите барлыкка килүен күрәбез. Укучыларны һәм педагогларны яңа ремонт кына түгел, яңа мөмкинлекләр дә гаҗәпләндерер һәм сөендерер дип уйлыйбыз.

Күрдем мәктәбе яңара
Күрдем мәктәбе яңара
Күрдем мәктәбе яңара
Күрдем мәктәбе яңара
Күрдем мәктәбе яңара
Автор:Сирена Рахимьянова
Читайте нас: