«Җылы сүзе җанны җылыта»

Социаль яклау системасында ул 2022 елдан бирле эшли. Социаль хезмәткәр карамагында – ярдәмгә мохтаҗ 18 өлкән яшьтәге әби-бабай. Аның иңнәренә бихисап бурычлар йөкләтелгән. Караучысыз калган яки балалары читтә яшәгән, ярдәмгә мохтаҗ әби-бабайларны, инвалидларны хезмәтләндереп кенә калмый Зөбәрҗәт, аларның шатлыкларын да, борчуларын да уртаклаша, кирәк икән, табиб та, психолог та, сердәш тә була белә.

Тумышы белән Зөбәрҗәт Алик кызы Мәмәтәй авылыннан. Мәмәтәй башлангыч, Иске Кайпан урта мәктәпләрен тәмамлаганнан соң, Башкорт төньяк-көнбатыш авыл хуҗалыгы колледжында автомеханик һөнәрен үзләштерә. 2010 елда Беләш авылы егете Марат Әҗмехан улы белән гаилә коралар. Авылда эш урыннары бармак белән генә санарлык, шуңа күрә Зөбәрҗәткә өйдә утырырга туры килә. Хатын-кызга хуҗалыкта да эш җитәрлек, тик торырга вакыты калмый аның. Һәм социаль хезмәткәр вазыйфасын тәкъдим иткәч, шатланып эшкә тотына ул.

Хезмәтен һич авырсынмый башкара Зөбәрҗәт Алик кызы. Үз канаты астындагыларның киемнәрен дә юа, чәчләрен дә тарый, утка-суга килгән квитанцияләрен дә йөгертеп түләп куя, азык-төлек тә алып кайтып бирә, дәваханәгә дә алып бара.

Миңа да дүртенче ел өй эшләрендә дә, хуҗалыкта да Зөбәрҗәт Шәбетдинова булыша. Ул үз бурычларына бик җаваплы карый. Шул ук вакытта, яшь булуына карамастан, бик ярдәмчел, тормышны аңлый, башкаларның кайгы-хәсрәтләрен чын күңелдән кичерә белә.

– Ялгыз калган өлкән яшьтәге кешеләр көннәр буе өйдә берүзләре. Аларга күңелсез. Син болай гына булса да кереп чык, диләр. Барам инде. Бергәләп чәй эчәбез, сөйләшеп утырабыз, – ди Зөбәрҗәт.

Ул һәрвакыт елмаеп, киң күңел белән һәрберебезнең хәлләрен, сәламәтлекләрен сораша. Ял яки бәйрәм көннәренә карамыйча, шалтыратып, берәр нәрсә кирәкмимме, дип, сәламәтлегебез турында сораша. Әгәр берәр нәрсә кирәк икән, үзенә шалтыратырга куша. Үз эшен намус белән башкара ул. Хәзерге дөньяда андый кешеләрне сирәк очратасың.

Зөбәрҗәт Алик кызы һәркайда өлгерә. Авылның иҗтимагый тормышында да актив катнаша ул. Илмира Шәймәрданова, Зинфира Хәтмуллина, Зинира Зыянтдинова кебек башка активистлар белән бәйрәмнәргә һәм башка даталарга төрле чаралар оештыра.

Аны авылдашлары да, хезмәттәшләре дә, аның карамагындагы өлкән яшьтәгеләр дә ярата һәм хөрмәт итә.

Зөбәрҗәт Шәбетдинова – изгелекле, олы йөрәкле кеше. Ул менә дигән хезмәткәр, сөекле хатын, кадерле әни. Тормыш иптәше белән 12 һәм 8 яшьлек ике матур кыз үстерәләр. Балалары бик тәрбияле, яхшы укыйлар, әти-әниләренә хуҗалыкта ярдәм итәләр.

Без, аның карамагындагы өлкән буын кешеләре, авыр хезмәте, яхшы холкы өчен бик рәхмәтле. Рәхмәт сиңа, олы йөрәкле, матур күңелле авылдашыбыз!